Awtorizzazzjoni għall-Operazzjoni ta’ Faċilità Primarja tal-Ħżin tal-Petroleum

Ir-Regolatur għas-Servizzi tal-Enerġija u l-Ilma joħroġ awtorizzazzjonijiet lil persuni biex joperaw faċilitajiet primarji tal-ħżin tal-petroleum skont ir-Regolamenti dwar il-Petroleum fis-Suq tal-Karburanti bl-Ingrossa fuq l-Art, l-Ibbottiljar tal-LPG u l-Faċilitajiet tal-Ħżin Primarji – L.S. 545.17.

“Faċilità primarja tal-ħżin” tfisser faċilità awtorizzata, approvata mir-Regolatur għall-ħażna ta’ prodotti tal-petroleum, sew onshore kif ukoll offshore, li taqa’ taħt l-ambitu tar-Regolamenti dwar il-Kontroll ta’ Perikli ta’ Inċidenti Kbar u, jew kwalunkwe faċilità tal-ħżin użata għall-finijiet ta’ bejgħ bl-ingrossa, jew kwalunkwe faċilità tal-ħżin oħra speċifikata għal dan il-għan mir-Regolatur.

Kull persuna (inkluż persuna ġuridika) li beħsiebha:

1. topera faċilità primarja tal-ħżin tal-petroleum;
2. iġġedded awtorizzazzjoni eżistenti għall-operazzjoni ta’ faċilità primarja tal-ħżin tal-petroleum;
3. tittrasferixxi awtorizzazzjoni eżistenti għall-operazzjoni ta’ faċilità primarja tal-ħżin tal-petroleum;

għandha tapplika bil-miktub lir-Regolatur għas-Servizzi tal-Enerġija u l-Ilma u għandu jkollha fil-pussess tagħha awtorizzazzjoni maħruġa mir-Regolatur taħt dawn ir-regolamenti qabel ma tipprovdi u toffri dak is-servizz, u topera dik is-sistema, u twettaq u teżerċita dik l-attività ta’ servizz.

Applikanti prospettivi mistiedna jirreferu għall-Mudell ta’ Awtorizzazzjoni għal Faċilità Primarja tal-Ħżin tal-Petroleum sabiex jiksbu idea ċara tal-awtorizzazzjonijiet ta’ dan it-tip li jinħarġu mir-REWS.

Applikazzjoni għall-ħruġ, tiġdid jew trasferiment ta’ Awtorizzazzjoni għall-Operazzjoni ta’ Faċilità Primarja tal-Ħżin tal-Petroleum:

Primary Storage Facility e-Form.

Primary Storage Facility Form (English Version)  REWS/023/v11-04-03/24

Regolamenti dwar il-Petroleum fis-Suq tal-Karburanti bl-Ingrossa fuq l-Art, l-Ibbottiljar tal-LPG u l-Faċilitajiet tal-Ħżin Primarji – L.S. 545.17

Nota: L-applikanti huma mħeġġa biex iqabbdu lil xi ħadd  sabiex jgħinhom jimlew il-formola tal-applikazzjoni.

1. Dettalji/numru tal-karta tal-identità jew tal-passaport tal-applikant;
2. F’każ ta’ entità legali, dettalji/numru(i) tal-karta(i) tal-identità jew passaport(i) tar-rappreżentant(i) legali;
3. Firma tal-applikant bl-idejn jew f’każ ta’ entità legali, il-firma(firem) tar-rappreżentant(i) legali tal-entità.

Barra minn hekk, f’każ ta’ applikazzjonijiet għat-trasferiment ta’ awtorizzazzjoni, id-dettalji hawn fuq imsemmija għandhom jiġu sottomessi wkoll fir-rigward tal-provditur awtorizzat kurrenti.

Għall-applikazzjonijiet kollha:

1. Kopja tal-karta tal-identità jew tal-passaport tal-applikant jew f’każ ta’ entità legali, kopja tal-karta(i) tal-identità jew tal-passaport(i) tar-rappreżentant(i) legali tal-entità.
2. Kopja oriġinali taċ-ċertifikat tal-kondotta tal-applikant, maħruġ mill-Pulizija, li fid-data tal-applikazzjoni ma jkunx ilu li ħareġ aktar minn tliet (3) xhur. F’każ ta’ kumpaniji, jintalbu wkoll iċ-ċertifikat(i) tal-kondotta maħruġa mill-Pulizija fir-rigward tar-rappreżentant(i) legali.
3. Pjan tan-Negozju tal-operazzjonijiet proposti bi projezzjoni ta’ tliet (3) snin, inkluż projezzjonijiet finanzjarji.

Għal faċilitajiet primarij tal-ħżin li ma jaqgħux taħt l-ambitu tar-Regolamenti dwar il-Kontroll ta’ Perikli ta’ Inċidenti Kbar:

Fl-istadju tad-disinn:

1. Proposta Teknika kkompilata mill-Persuna Kompetenti, li tindika d-dettalji tad-disinn propost għall-faċilità tal-ħżin.

Malli jitlesta l-iżvilupp:

1. Ċertifikat ta’ Konformità maħruġ mill-Awtorità tal-Ippjanar fir-rigward tal-faċilità tal-ħżin;
2. Kopja tal-Permess Ambjentali maħruġ mill-Awtorità għall-Ambjent u r-Riżorsi;
3. Rapport tal-Kummissjonar ikkompilat mill-Persuna Kompetenti, flimkien mad-Dikjarazzjoni tar-Rapport tal-Kummissjonar tal-Faċilità Primarja tal-Ħżin;
4. Kopja tal-iskeda tal-assigurazzjoni u l-polza tal-assigurazzjoni rispettiva, li tindika l-livell ta’ kopertura għar-responsabbiltà lejn terzi persuni fil-konfront ta’ ħsara fuq il-persuna u ħsara lill-proprjetà kkawżati mill-ħżin tal-petroleum u l-operazzjonijiet assoċjati tal-faċilità tal-ħżin.

Għal faċilitajiet primarji tal-ħżin li jaqgħu taħt l-ambitu tar-Regolamenti dwar il-Kontroll ta’ Perikli ta’ Inċidenti Kbar:

1. Ċertifikat ta’ Konformità maħruġ mill-Awtorità tal-Ippjanar fir-rigward tal-faċilità tal-ħżin;
2. Kopja tal-Permess dwar il-Prevenzjoni u l-Kontroll Integrat tat-Tniġġis (IPPC) maħruġ mill-Awtorità għall-Ambjent u r-Riżorsi;
3. Rapport tal-Kummissjonar ikkompilat minn konsulent indipendenti;
4. Dikjarazzjoni magħmula minn konsulent indipendenti f’isem il-Provditur Awtorizzat li biha jiddikjara li r-rekwiżiti u l-obbligi kollha kif stabbiliti mir-Regolamenti dwar il-Kontroll ta’ Perikli ta’ Inċidenti Kbar qed jiġu mħarsa, u li l-installazzjoni mhijiex soġġetta għall-ebda projbizzjoni maħruġa taħt ir-Regolamenti dwar il-Kontroll ta’ Perikli ta’ Inċidenti Kbar;
5. Kopja tal-iskeda tal-assigurazzjoni u d-dettalji tal-polza tal-assigurazzjoni rispettiva, li tindika l-livell ta’ kopertura għar-responsabbiltà lejn terzi persuni fil-konfront ta’ ħsara fuq il-persuna u ħsara lill-proprjetà kkawżati mill-ħżin tal-petroleum u l-operazzjonijiet assoċjati tal-faċilità tal-ħżin.

It-tariffi applikabbli huma kif ġej:

• it-tariffa tal-applikazzjoni mhix rifondibbli għal din l-applikazzjoni hi ta’ €233 (mitejn u tlieta u tletin ewro);
• it-tariffa tal-awtorizzazzjoni applikabbli għall-operazzjoni ta’ faċilità primarja tal-ħżin hija ta’:
  •  €1,500 fis-sena fil-każ ta’ faċilità primarja tal-ħżin li ma tkunx teċċedi kapaċità ta’ sitt tunnellati, iżda li fil-każ ta’ faċilità primarja tal-ħżin tal-LPG dan l-ammont ta’ tariffa tal-awtorizzazzjoni għandu jkun applikabbli meta l-kapaċità ma tkunx teċċedi żewġ tunnellati;
  • €2,500 fis-sena fil-każ ta’ faċilità primarja tal-ħżin li ma tkunx teċċedi kapaċità ta’ 2,500 tunnellata, iżda li fil-każ ta’ faċilità primarja tal-ħżin tal-LPG dan l-ammont ta’ tariffa tal-awtorizzazzjoni għandu jkun applikabbli meta l-kapaċità ma tkunx teċċedi 50 tunnellata;
  • €5,000 fis-sena fil-każ ta’ faċilità primarja tal-ħżin li tkun teċċedi l-kapaċitajiet imsemmija fil-paragrafu (ii) iżda li ma tkunx teċċedi l-kapaċità ta’ 25,000 tunnellata;
  • €10,000 fis-sena fil-każ ta’ faċilità primarja tal-ħżin li tkun teċċedi l-kapaċità ta’ 25,000 tunnellata imma li ma tkunx teċċedi l-kapaċità ta’ 100,000 tunnellata;
  • €15,000 fis-sena fil-każ ta’ faċilità primarja tal-ħżin li tkun teċċedi l-kapaċità ta’ 100,000 tunnellata.

Ir-regolament 34 tar-Regolamenti dwar il-Petroleum fis-Suq tal-Karburanti bl-Ingrossa fuq l-Art, l-Ibbottiljar tal-LPG u l-Faċilitajiet tal-Ħżin Primarji jistabbilixxi li jekk persuna twettaq xi reat kontra dawn ir-regolamenti, meta tinstab ħatja tista’ teħel priġunerija għal perjodu ta’ mhux aktar minn tmintax-il xahar, jew multa ta’ mhux aktar minn disgħa u sittin elf u tmien mija u wieħed u tmenin ewro u għoxrin ċenteżmu (€69,881.20), jew ta’ elf u tliet mija u sebgħa u disgħin ewro u tnejn u sittin ċenteżmu (€1,397.62) għal kull jum li fih jibqa’ għaddej ir-reat, jew tali multa u priġunerija flimkien.

Barra minn hekk, l-Att dwar ir-Regolatur għas-Servizzi tal-Enerġija u l-Ilma jipprovdi li:

• kwalunkwe persuna li twettaq tali attività mingħajr liċenzja jew taġixxi bi ksur ta’ xi kundizzjoni tal-liċenzja tkun ħatja ta’ reat u teħel, meta tinstab ħatja, multa ta’ mhux iżjed minn mija u ħmistax-il elf ewro (€115,000) jew priġunerija għal żmien ta’ mhux iżjed minn sentejn, jew tali multa u priġunerija flimkien.
• ir-Regolatur jista’ jimponi penali amministrattiva fuq kwalunkwe persuna li tikser xi dispożizzjoni tal-Att jew tar-regolamenti magħmulin taħtu jew ta’ kwalunkwe liġi oħra li r-Regolatur għandu jedd jinforza, jew li tonqos milli tikkonforma ruħha ma’ xi direttiva jew deċiżjoni mogħtija mir-Regolatur, jew li tonqos milli tosserva kwalunkwe kundizzjoni ta’ xi awtorizzazzjoni mogħtija taħt l-Att. Din il-multa amministrattiva m’għandhiex teċċedi:
  • mitt elf ewro (€100,000) għal kull kontravenzjoni u, jew sitt mitt ewro (€600) għal kull jum ta’ nuqqas ta’ konformità, mid-data tad-deċiżjoni mogħtija mir-Regolatur; u, jew
  • f’każ ta’ intrapriża (inkluż intrapriża integrata vertikalment) jew korp ġuridiku, sa 10% tad-dħul totali kkonċernat fis-sena finanzjarja preċedenti. Madankollu, f’każ ta’ intrapriża, inkluż intrapriża integrata vertikalment jew korp ġuridiku, tista’ fi kwalunkwe każ tiġi imposta multa sa 10% tad-dħul annwali kkonċernat fis-sena finanzjarja preċedenti, liema ammont jeċċedi mitt elf ewro (€100,000).

Fil-każ ta’ applikazzjoni għal awtorizzazzjoni biex tiġi operata faċilità primarja tal-ħżin tal-petroleum, ir-regolament 9 tar-Regolamenti dwar il-Petroleum fis-Suq tal-Karburanti bl-Ingrossa fuq l-Art, l-Ibbottiljar tal-LPG u l-Faċilitajiet tal-Ħżin Primarji jistabbilixxi li r-Regolatur għandu jikkomunika mal-applikant bil-miktub fi żmien raġonevoli, li m’għandux ikun ta’ aktar minn tliet (3) xhur mid-data meta tasal għandu applikazzjoni valida.

Fil-każ ta’ applikazzjoni għal tiġdid, ir-regolament 10 jistabbilixxi li applikazzjoni biex tiġġedded awtorizzazzjoni għandha tiġi sottomessa bil-miktub lir-Regolatur sitt (6) xhur qabel id-data li fiha tkun se tiskadi l-awtorizzazzjoni.

Ir-Regolamenti dwar il-Petroleum fis-Suq tal-Karburanti bl-Ingrossa fuq l-Art, l-Ibbottiljar tal-LPG u l-Faċilitajiet tal-Ħżin Primarji jistabbilixxu wkoll li, f’każ li r-Regolatur jonqos milli jinforma lill-applikant dwar kwalunkwe deċiżjoni meħuda li tikkonċerna aċċess għal xi attività ta’ servizz jew l-eżerċizzju tagħha, inkluż ir-rifjut jew l-irtirar ta’ xi awtorizzazzjoni, dan bl-ebda mod m’għandu jfisser li r-Regolatur ikun approva dik l-awtorizzazzjoni b’mod taċitu u li l-applikant ikun awtomatikament ġie mogħti aċċess biex iwettaq jew jeżerċita xi attività ta’ servizz.

Kull deċiżjoni li tittieħed mir-Regolatur, inkluż ċaħda ta’ applikazzjoni jew irtirar ta’ awtorizzazzjoni jew liċenzja, tista’ tkun soġġetta għal appell quddiem it-Tribunal ta’ Reviżjoni Amministrattiva mwaqqaf bl-artikolu 5 tal-Att Dwar l-Amministrazzjoni tal-Ġustizzja u d-dispożizzjonijiet tal-artikolu 14 tar-Regolamenti dwar il-Petroleum fis-Suq tal-Karburanti bl-Ingrossa fuq l-Art, l-Ibbottiljar tal-LPG u l-Faċilitajiet tal-Ħżin Primarji – L.S. 545.17.

Tista’ tissottometti l-formola tal-applikazzjoni flimkien mad-dokumentazzjoni kollha relatata u l-pagamenti relevanti msemmija fil-formola tal-applikazzjoni, bil-posta jew inkella bl-idejn indirizzata lil:

Ir-Regolatur għas-Servizzi tal-Enerġija u l-Ilma,
Zentrum Business Centre, Livell 1
Triq l-Imdina
Ħal Qormi QRM 9010
Malta