Awtorizzazzjoni għall-Operazzjoni ta’ Pompa li Tbigħ l-Autogas bl-Imnut

Awtorizzazzjoni għall-Operazzjoni ta’ Pompa li Tbigħ l-Autogas bl-Imnut

Ir-Regolatur għas-Servizzi tal-Enerġija u l-Ilma joħroġ awtorizzazzjonijiet lil persuni biex joperaw pompa li tbigħ l-Autogas bl-imnut skont ir-Regolamenti dwar is-Suq tal-Gass Petroleum Likwefatt – L.S. 545.20.

“Pompa li tbigħ l-autogas bl-imnut” tfisser faċilità li ġiet awtorizzata mir-Regolatur biex taħżen u tbigħ l-Autogas bl-imnut u li tista’ tkun soġġetta għal kwalunkwe kundizzjonijiet li r-Regolatur jista’ jistabbilixxi.

Kull persuna (inkluż persuna ġuridika) li beħsiebha:

1. topera pompa li tbigħ l-Autogas bl-imnut;
2. iġġedded awtorizzazzjoni eżistenti biex topera pompa li tbigħ l-Autogas bl-imnut;
3. tittrasferixxi awtorizzazzjoni eżistenti biex topera pompa li tbigħ l-Autogas bl-imnut;

għandha tapplika bil-miktub lir-Regolatur għas-Servizzi tal-Enerġija u l-Ilma u għandu jkollha fil-pussess tagħha awtorizzazzjoni maħruġa mir-Regolatur taħt dawn ir-regolamenti qabel ma tipprovdi u toffri dak is-servizz, u topera dik is-sistema, u twettaq u teżerċita dik l-attività ta’ servizz.

Applikanti prospettivi mistiedna jirreferu għall-Mudell ta’ Awtorizzazzjoni għall-Operazzjoni ta’ Pompa li Tbigħ l-Autogas bl-Imnut sabiex jiksbu idea ċara tal-awtorizzazzjonijiet ta’ dan it-tip li jinħarġu mir-REWS.

Applikazzjoni għall-Ħruġ, Tiġdid jew Trasferiment:

Formola għall-Operazzjoni ta’ Pompa li Tbigħ l-Autogas bl-Imnut (Verżjoni bl-Ingliż)  REWS/108/v9-03-06/23

Formola elettronika għall-Operazzjoni ta’ Pompa li Tbigħ l-Autogas bl-Imnut (Verżjoni bl-Ingliż)

Regolamenti dwar is-Suq tal-Gass Petroleum Likwefatt – L.S. 545.20

Nota: L-applikanti huma mħeġġa biex iqabbdu lil xi ħadd mil–lista ta’ persuni kompetenti fit-teknoloġija tal-LPG  sabiex jgħinhom jimlew il-formola tal-applikazzjoni.

1. Dettalji/numru tal-karta tal-identità jew tal-passaport tal-applikant;
2. F’każ ta’ entità legali, dettalji/numru(i) tal-karta(i) tal-identità jew passaport(i) tar-rappreżentant(i) legali;
3. Firma tal-applikant bl-idejn jew f’każ ta’ entità legali, il-firma(firem) tar-rappreżentant(i) legali tal-entità.

Barra minn hekk, f’każ ta’ applikazzjonijiet għat-trasferiment ta’ Awtorizzazzjoni, id-dettalji hawn fuq imsemmija għandhom jiġu sottomessi wkoll fir-rigward tal-provditur awtorizzat kurrenti.

1. Kopja tal-karta tal-identità jew tal-passaport tal-applikant;
2. F’każ ta’ entità legali, kopji tal-karta(i) tal-identità jew tal-passaport(i) tar-rappreżentant(i) legali;
3. Kopja oriġinali taċ-ċertifikat tal-kondotta tal-applikant, maħruġ mill-Pulizija, li fid-data tal-applikazzjoni ma jkunx ilu li ħareġ aktar minn tliet (3) xhur. F’każ ta’ kumpaniji, jintalbu ċ-ċertifikat(i) tal-kondotta maħruġa mill-Pulizija fir-rigward tar-rappreżentant(i) legali.

Fl-istadju tad-disinn tal-pompa li tbigħ l-Autogas bl-imnut kif proposta:

1. Żewġ (2) kopji ta’ Proposta Teknika kkompilata mill-Persuna Kompetenti, li tindika d-dettalji tad-disinn propost għall-pompa ġdida li tbigħ l-Autogas bl-imnut. Din għandha tinkludi d-dokument tekniku ta’ sostenn, ir-rapport li jiddiskrivi l-pompa li tbigħ l-Autogas bl-imnut u operazzjonijiet assoċjati kif proposti, pjanta tas-sit fi skala 1:2500 u disinni f’daqs minimu A3.

Wara li jkun inħareġ permess preliminari mir-Regolatur u malli titlesta l-pompa ġdida li tbigħ l-Autogas bl-imnut:

1. Permess approvat mill-Awtorità tal-Ippjanar fir-rigward tal-pompa li tbigħ l-Autogas bl-imnut;
2. Rapport tal-Kummissjonar ikkompilat minn Persuna Kompetenti fit-Teknoloġija tal-LPG;
3. Kopja tal-iskeda tal-assigurazzjoni u d-dettalji tal-polza tal-assigurazzjoni rispettiva, li tindika l-livell ta’ kopertura għar-responsabbiltà lejn terzi persuni fil-konfront ta’ ħsara fuq il-persuna u ħsara lill-proprjetà kkawżati mill-ħżin tal-LPG u l-operazzjonijiet assoċjati tal-pompa li tbigħ l-Autogas bl-imnut.

F’każ ta’ tiġdid jew trasferiment ta’ pompa li tbigħ l-Autogas bl-imnut li għandha awtorizzazzjoni eżistenti:

1. L-aħħar rapport ta’ spezzjoni, regolarment ikkompilat u ffirmat minn persuna kompetenti u li ma jkunx datat aktar minn sena qabel id-data tas-sottomissjoni tal-applikazzjoni;
2. L-iskeda tal-assigurazzjoni u d-dettalji tal-polza tal-assigurazzjoni rispettiva tal-pompa eżistenti li tbigħ l-Autogas bl-imnut;
3. Kwalunkwe dokumentazzjoni oħra meħtieġa mir-Regolatur jew mill-kundizzjonijiet tal-awtorizzazzjoni.

It-tariffi applikabbli huma kif ġej:

1. Tariffa tal-applikazzjoni, mhix rifondibbli, ta’ €500 (ħames mitt ewro);
2. Tariffa annwali tal-awtorizzazzjoni għall-operazzjoni ta’ pompa li tbigħ l-Autogas bl-imnut ta’ €500 u €50 għal kull żennuna.
3. Nota: F’każ li l-pompa li tbigħ l-Autogas bl-imnut tifforma parti minn pompa tal-petrol, it-tariffa annwali tal-awtorizzazzjoni ta’ €500 titħallas darba biss għall-pompa kollha kemm hi.

Ir-regolament 28 tar-Regolamenti dwar is-Suq tal-Gass Petroleum Likwefatt jistabbilixxi li jekk persuna twettaq xi reat kontra dawn ir-regolamenti, meta tinstab ħatja tista’ teħel priġunerija għal perjodu ta’ mhux iktar minn tmintax-il-xahar, jew multa ta’ mhux aktar minn sebgħin elf ewro (€70,000), jew ta’ elf u ħames mitt ewro (€1,500) għal kull jum li fih jibqa’ għaddej ir-reat, jew tali multa u priġunerija flimkien.

Barra minn hekk, l-Att dwar ir-Regolatur għas-Servizzi tal-Enerġija u l-Ilma jipprovdi li:

1. kwalunkwe persuna li twettaq tali attività mingħajr liċenzja jew taġixxi bi ksur ta’ xi kundizzjoni tal-liċenzja tkun ħatja ta’ reat u teħel, meta tinstab ħatja, multa ta’ mhux iżjed minn mija u ħmistax-il elf ewro (€115,000) jew priġunerija għal żmien ta’ mhux iżjed minn sentejn, jew tali multa u priġunerija flimkien.
2. ir-Regolatur jista’ jimponi penali amministrattiva fuq kwalunkwe persuna li tikser xi dispożizzjoni tal-Att jew tar-regolamenti magħmulin taħtu jew ta’ kwalunkwe liġi oħra li r-Regolatur għandu jedd jinforza, jew li tonqos milli tikkonforma ruħha ma’ xi direttiva jew deċiżjoni mogħtija mir-Regolatur, jew li tonqos milli tosserva kwalunkwe kundizzjoni ta’ xi awtorizzazzjoni mogħtija taħt l-Att. Din il-multa amministrattiva m’għandhiex teċċedi:
   1. mitt elf ewro (€100,000) għal kull kontravenzjoni u, jew sitt mitt ewro (€600) għal kull jum ta’ nuqqas ta’ konformità, mid-data tad-deċiżjoni mogħtija mir-Regolatur; u, jew
   2. f’każ ta’ intrapriża (inkluż intrapriża integrata vertikalment) jew korp ġuridiku, sa 10% tad-dħul totali kkonċernat fis-sena finanzjarja preċedenti. Madankollu, f’każ ta’ intrapriża, inkluż intrapriża integrata vertikalment jew korp ġuridiku, tista’ fi kwalunkwe każ tiġi imposta multa sa 10% tad-dħul annwali kkonċernat fis-sena finanzjarja preċedenti, liema ammont jeċċedi mitt elf ewro (€100,000).

Fil-każ ta’ applikazzjoni għal pompa li tbigħ l-Autogas bl-imnut, ir-regolament 7 tar-Regolamenti dwar is-Suq tal-Gass Petroleum Likwefatt jistabbilixxi li r-Regolatur għandu jikkomunika mal-applikant bil-miktub fi żmien raġonevoli, li m’għandux ikun ta’ aktar minn tliet xhur mid-data meta tasal għandu applikazzjoni valida.

Fil-każ ta’ applikazzjoni għal tiġdid, ir-regolament 7 jistabbilixxi li applikazzjoni biex tiġġedded awtorizzazzjoni għandha tiġi sottomessa bil-miktub lir-Regolatur, bil-mod kif ir-Regolatur jista’ jirrikjedi, sitt xhur qabel id-data li fiha tkun se tiskadi l-awtorizzazzjoni.

Ir-Regolamenti dwar is-Suq tal-Gass Petroleum Likwefatt jistabbilixxu wkoll li, f’każ li r-Regolatur jonqos milli jinforma lill-applikant dwar kwalunkwe deċiżjoni meħuda li tikkonċerna aċċess għal xi attività ta’ servizz jew l-eżerċizzju tagħha, inkluż ir-rifjut jew l-irtirar ta’ xi awtorizzazzjoni, dan bl-ebda mod m’għandu jfisser li r-Regolatur ikun approva dik l-awtorizzazzjoni b’mod taċitu u li l-applikant ikun awtomatikament ġie mogħti aċċess biex iwettaq jew jeżerċita xi attività ta’ servizz.

Kull deċiżjoni li tittieħed mir-Regolatur, inkluż ċaħda ta’ applikazzjoni jew irtirar ta’ awtorizzazzjoni, tista’ tkun soġġetta għal appell quddiem it-Tribunal ta’ Reviżjoni Amministrattiva mwaqqaf bl-artikolu 5 tal-Att Dwar l-Amministrazzjoni tal-Ġustizzja u d-dispożizzjonijiet tal-artikolu 26 tar-Regolamenti dwar is-Suq tal-Gass Petroleum Likwefatt – L.S. 545.20.

Tista’ tissottometti l-formola tal-applikazzjoni flimkien mad-dokumentazzjoni kollha relatata u l-pagamenti relevanti msemmija fil-formola tal-applikazzjoni, bil-posta jew inkella bl-idejn indirizzata lil:

Ir-Regolatur għas-Servizzi tal-Enerġija u l-Ilma,
Zentrum Business Centre, Livell 1
Triq l-Imdina
Ħal Qormi QRM 9010
Malta