Elettriku

Konnessjoni mas-Sistema ta’ Distribuzzjoni tal-Elettriku

Ir-Regolatur għas-Servizzi tal-Enerġija u l-Ilma jirregola l-Enemalta plc, li hi l-unika entità f’Malta li hi liċenżjata biex twettaq il-funzjonijiet ta’ operatur tas-sistema ta’ distribuzzjoni tal-elettriku u fornitur tal-elettriku lill-klijenti finali.

Kemm il-liċenzja biex twettaq kwalunkwe funzjoni ta’ operatur tas-sistema ta’ distribuzzjoni kif ukoll il-liċenzja biex tipprovdi l-elettriku nħarġu skont ir-Regolamenti dwar is-Suq tal-Elettriku. Ir-Regolamenti dwar is-Suq tal-Elettriku jirrikjedu li l-operatur tas-sistema ta’ distribuzzjoni (Enemalta plc) jipprovdi servizz universali lill-klijenti domestiċi kollha u, meta l-Ministru jqis li jkun xieraq, lil intrapriżi żgħar ukoll.

Skont il-kundizzjonijiet tar-Regolamenti dwar is-Suq tal-Elettriku u l-liċenzja, ġie ppubblikat Charter għall-Klijenti li jifforma parti minn dak li jitqies bħala l-kuntratt bejn l-Enemalta u l-klijenti li jużaw is-servizzi tagħha. Iċ-Charter għall-Klijenti ġie approvat mir-Regolatur għas-Servizzi tal-Enerġija u l-Ilma, u jistabbilixxi d-drittijiet u l-obbligi tal-Enemalta plc u l-klijenti tagħha.

Kull persuna li tixtieq tqabbad il-proprjetà tagħha mas-sistema tad-distribuzzjoni tal-elettriku u tiġi pprovduta bl-elettriku trid tissottometti applikazzjoni bil-miktub lill-ARMS Ltd, kumpanija sussidjarja tal-Enemalta plc u l-Korporazzjoni għas-Servizzi tal-Ilma (WSC), li twaqqfet biex tamministra u topera s-sistemi tal-kontijiet tad-dawl u l-ilma, assistenza għall-klijenti, u l-funzjonijiet ta’ kuntatt mal-pubbliku.

Aktar dettalji jistgħu jinkisbu mis-sit elettroniku tal-ARMS Ltd: www.arms.com.mt

It-tariffi għall-provvista u l-installazzjoni ta’ konnessjoni ta’ servizz tal-elettriku ġdid jew titjib ta’ servizz eżistenti huma regolati mir-Regolament 14 tar-Regolamenti fuq il-Provvista tal-Elettriku, kif ġej:

1. €300 (tliet mitt ewro) għal provvisti single-phase b’kapaċità nominali sa 40 Amp u f’distanza sa 150 metru mill-eqreb provvista tajba ta’ vultaġġ baxx;
    
2. €900 (disa’ mitt ewro) għal provvisti three-phase b’kapaċità nominali sa 60 Amp kull fażi u f’distanza sa 150 metru mill-eqreb provvista tajba ta’ vultaġġ baxx.

Barra minn hekk, 

3. Fejn it-tul tar-rotta tas-servizz ikun iktar minn 150 metru mill-eqreb sors tajjeb ta’ provvista ta’ vultaġġ baxx:
   
   • f’każ ta’ provvisti single-phase b’kapaċità nominali sa 40 Amp, l-applikant irid iħallas l-ispejjeż kollha tal-estensjoni li minnhom titnaqqas it-tariffa tal-konnessjoni msemmija f’punt (a). Tapplika tariffa minima ta’ €430 (erba’ mija u tletin ewro).
      
   • f’każ ta’ provvisti three-phase b’kapaċità nominali sa 60 Amp kull fażi, l-applikant irid iħallas l-ispejjeż kollha tal-estensjoni li minnhom jitnaqqsu t-tariffi tal-konnessjoni msemmija f’punt (b). Tapplika tariffa minima ta’ €1,300 (elf u tliet mitt ewro).
      
4. f’każ ta’ servizzi three-phase b’kapaċità nominali ta’ aktar minn 60 Amp kull fażi (provvista bl-ingrossa), l-applikant irid iħallas l-ispejjeż kollha tal-estensjoni mill-eqreb substation, sakemm in-numru ta’ Amps multiplikat bid-distanza ma jeċċedix 30,000. Barra minn hekk, tkun dovuta kontribuzzjoni għal vultaġġ għoli ta’ €81.52 kull kVA. Provvisti bl-ingrossa jistgħu jkollhom kapaċità nominali ta’: 100 Amp, 125 Amp, 160 Amp, 200 Amp, 250 Amp, 315-il Amp, 355 Amp, 400 Amp, 450 Amp, 500 Amp.
    
5. F’każ ta’ servizzi three-phase b’kapaċità nominali ta’ aktar minn 60 Amp kull fażi, u n-numru ta’ Amps multiplikat bid-distanza jeċċedi t-30,000, tkun tinħtieġ substation ġdida li trid tiġi ffinanzjata jew mill-applikant jekk din tkun iddisinjata għall-użu tiegħu biss, jew inkella bi ftehim ta’ qsim tal-ispejjeż mal-Enemalta plc u/jew ma’ klijenti oħra f’każ ta’ substation kondiviża.

Djar, appartamenti, flettijiet, fabbriki, lukandi, stabbilimenti kummerċjali, uffiċini u kwalunkwe binjiet oħra li huma internament interkonnessi fiżikament, jingħatalhom servizz tal-elettriku wieħed biss sakemm iċ-Chairman ma jawtorizzax mod ieħor.

F’każ ta’ aktar minn konsumatur wieħed fi ħdan żvilupp wieħed, il-mod kif l-iżvilupp jingħata konnessjoni tal-elettriku mas-sistema ta’ distribuzzjoni jiddependi fuq it-tip ta’ servizzi meħtieġa minn kull klijent individwali fi ħdan l-iżvilupp, id-domanda totali tal-iżvilupp, u d-distanza min-netwerk eżistenti tad-distribuzzjoni, kif stabbilit mir-Regolament 14(2) tar-Regolamenti fuq il-Provvista tal-Elettriku.

Ix-xogħlijiet marbuta mal-provvista ta’ konnessjoni ta’ servizz jitwettqu mill-operatur tas-sistema ta’ distribuzzjoni sakemm ma jkunx hemm ftehim li l-applikant se jagħmel parti mix-xogħlijiet hu, u dan f’każ ta’ provvisti bl-ingrossa u substations.

Aktar dettalji jistgħu jinkisbu mis-sit elettroniku tal-ARMS Ltd: www.arms.com.mt

F’każ fejn:

1. Persuna tibda tokkupa residenza li diġà moqdija b’konnessjoni tas-servizz tal-elettriku mas-sistema ta’ distribuzzjoni tal-elettriku, trid tiġi sottomessa applikazzjoni lill-Enemalta plc tramite l-ARMS Ltd biex tiġi reġistrata l-bidla fil-konsumatur;
    
2. Post ikun mikri għal aktar minn tliet xhur lil kwalunkwe persuna oħra li mhijiex residenta permanenti f’Malta, il-persuna li hi s-sid jew li tamministra jew li għandha f’idejha l-kontroll ta’ dak il-post trid tinnotifika lill-Enemalta plc, kif stabbilit fir-Regolament 11 tar-Regolamenti fuq il-Provvista tal-Elettriku;
    
3. Post ikun mikri lil kwalunkwe persuna, sew jekk espressament jew b’mod taċitu, bil-ġimgħa, jew bix-xahar, jew għal mhux aktar minn tliet xhur, jew fejn il-post li jkun inkera għal aktar minn tliet xhur fil-fatt ikun okkupat mill-kerrej għal inqas minn tliet xhur, il-persuna li hi s-sid jew li tamministra jew li għandha l-kontroll tal-post tkun responsabbli in solidum mal-kerrej għal kwalunkwe dejn dovut minn dan tal-aħħar fuq il-kiri tal-meter u l-provvista tal-elettriku għal dak il-post.

Aktar dettalji jistgħu jinkisbu mis-sit elettroniku tal-ARMS Ltd: www.arms.com.mt

F’każ ta’ konnessjoni ġdida jew titjib ta’ servizz eżistenti, it-tariffi għal servizz ġdid huma dovuti kif stabbilit mir-Regolamenti fuq il-Provvista tal-Elettriku.

Barra minn hekk, l-Enemalta plc u l-ARMS Limited jitolbu li tiġi sottomessa dokumentazzjoni oħra flimkien mal-applikazzjoni għal servizz ġdid.

Jistgħu jinkisbu aktar dettalji mis-sit elettroniku tal-ARMS Ltd: www.arms.com.mt

F’Malta l-Enemalta plc hi l-uniku fornitur tal-elettriku regolat mir-Regolatur għas-Servizzi tal-Enerġija u l-Ilma u liċenzjat biex jipprovdi l-elettriku lill-klijenti finali. Għaldaqstant, mhux possibbli li jinbidel il-fornitur tal-elettriku.

Kull persuna li tixtieq tapplika għal:

1. tibdil fis-servizz tal-elettriku;
2. tneħħija ta’ konnessjoni tas-servizz tal-elettriku;
3. konnessjoni ta’ impjant ta’ sħana u enerġija kkombinati mal-grilja tal-elettriku;
4. gaiters jew tifi jew devjazzjoni;
5. korrezzjoni tal-fattur ta’ potenza;
6. reġistrazzjoni ta’ bidla fil-konsumatur;
7. rikonoxximent temporanju ta’ kerrej f’post mikri;
8. reġistrazzjoni ta’ bidla fil-konsumatur (bejn konjuġi);
9. bidla fid-dikjarazzjoni tan-numru ta’ persuni fuq il-kont;
10. għal rimedju;
11. test jew bidla tal-meter tal-elettriku;
12. kont aġġornat;
13. provvista tal-elettriku temporanja;
14. konnessjoni ta’ installazzjoni solari fotovoltajka;
15. konnessjoni ta’ installazzjoni ta’ turbina microwind;
16. bidla fit-tariffa tal-kont (inkluż bidla fl-għażla tat-tariffa feed-in);
17. ħlas lura fuq ħiter tal-ilma solari;
18. konnessjoni mill-ġdid ta’ servizz tal-elettriku;
19. dikjarazzjoni dwar servizz li ma jintużax regolarment;

irid jissottometti dik l-applikazzjoni bil-miktub lill-ARMS Ltd.

Aktar dettalji dwar dawn u servizzi oħrajn jistgħu jinkisbu mill-ARMS Ltd: www.arms.com.mt

Iċ-Charter għall-Klijenti ppubblikat mill-Enemalta plc jistabbilixxi provvedimenti sabiex jintlaqgħu lmenti mingħand il-klijenti.

L-ilmenti għandhom jintbagħtu lill-Enemalta plc / ARMS Ltd.:

1. jew permezz tas-sit elettroniku tagħhom – www.enemalta.com.mt u www.arms.com.mt;
2. jew b’kuntatt telefoniku mat-Tim tal-Assistenza tal-Klijent tal-Enemalta fuq freephone 8007 2224 jew permezz ta’ email fuq customercare.em@enemalta.com.mt għal ilmenti relatati ma’ problemi tekniċi;
3. jew b’kuntatt telefoniku mal-ARMS Ltd fuq freephone 8007 2222 jew permezz ta’ email fuq customercare@arms.com.mt għal problemi relatati ma’ kontijiet u applikazzjonijiet;
4. jew bi żjara f’wieħed miċ-Ċentri tal-Kuntatt tal-ARMS Limited, li jinsabu:
   1. Gattard House, Triq Nazzjonali, Il-Blata l-Bajda, Malta;
   2. Triq l-Ifran, Il-Belt Valletta, Malta;
   3. Triq il-Kapuċċini, Ir-Rabat, Għawdex;
   4. Triq il-Ħamrija, Ix-Xewkija, Għawdex.

Persuna li tixtieq tapplika għal ħlas ta’ danni trid tissottometti applikazzjoni bil-miktub lill-ARMS Ltd.

F’każ fejn konsumatur eżawrixxa l-proċess kollu tat-trattament tal-ilmenti mal-Enemalta plc u/jew mal-ARMS Ltd u jħoss li d-deċiżjoni li ttieħdet hi inġusta, jew iħoss li l-ilment tiegħu ma ġiex indirizzat kif xieraq, jista’ jissottometti lment rigward il-kwistjoni tiegħu lir-REWS taħt ir-Regolamenti dwar il-Proċeduri għad-Determinazzjoni ta’ Kwistjonijiet (L.S.545.30). Aktar dettalji dwar kif tista’ tirreġistra lment bħal dan mar-REWS jinstabu hawn: Notifika ta’ Kwistjoni details on how such a complaint may be submitted to REWS may be found here:  (Filing a Complaint).

Persuna li għandha bżonn l-għajnuna biex tħallas il-kont tagħha għandha tikkuntattja lit-taqsima tal-kontroll tal-kreditu tal-Enemalta.

Persuna bi bżonnijiet speċjali li għandha bżonn assistenza għandha tikkuntattja lill-Enemalta plc rigward kwalunkwe talba għal assistenza speċjali.

L-Enemalta plc hi regolata wkoll mir-Regolatur għas-Servizzi tal-Enerġija u l-Ilma skont l-Att dwar ir-Regolatur għas-Servizzi tal-Enerġija u l-Ilma u r-Regolamenti dwar is-Suq tal-Elettriku.

Ir-Regolamenti fuq il-Provvista tal-Elettriku jistabbilixxu dispożizzjonijiet marbutin ma’:

1. applikazzjonijiet għall-provvista tal-elettriku;
2. it-tariffi u l-ħlas tal-konnessjoni applikabbli;
3. depożiti, rifużjonijiet u garanziji;
4. kejl tal-konsum u kontijiet;
5. tbagħbis tal-meter;
6. notifika lill-Enemalta f’każ ta’ kiri ta’ post;
7. aċċess għal post u identifikazzjoni ta’ impjegati tal-Enemalta;
8. notifika ta’ appuntamenti biex jiġi installat apparat, eċċ.;
9. sospensjoni tal-provvista tal-elettriku.