Awtorizzazzjoni biex titħaddem Stazzjon tal-Fjuwil Marittimu

Awtorizzazzjoni għall-Operazzjoni ta’ Pompa li Tbigħ il-Karburanti Marittimi bl-Imnut Permezz ta’ Dispensers Operati fil-Viċinanza tal-Kosta u Esklussivament għall-Bastimenti

Ir-Regolatur għas-Servizzi tal-Enerġija u l-Ilma joħroġ awtorizzazzjonijiet lil persuni biex joperaw pompa li tbigħ il-karburanti marittimi bl-imnut permezz ta’ dispensers operati fil-viċinanza tal-kosta u esklussivament għall-bastimenti. Dawn l-awtorizzazzjonijiet jinħarġu skont ir-Regolamenti dwar l-Awtorizzazzjoni ta’ Bunkering – L.S. 545.25.

Kull persuna (inkluż persuna ġuridika) li beħsiebha:

1. topera pompa li tbigħ il-karburanti marittimi bl-imnut permezz ta’ dispensers operati fil-viċinanza tal-kosta u esklussivament għall-bastimenti;
2. iġġedded awtorizzazzjoni eżistenti għall-operazzjoni ta’ pompa li tbigħ il-karburanti marittimi bl-imnut permezz ta’ dispensers operati fil-viċinanza tal-kosta u esklussivament għall-bastimenti;
3. tittrasferixxi awtorizzazzjoni eżistenti għall-operazzjoni ta’ pompa li tbigħ il-karburanti marittimi bl-imnut permezz ta’ dispensers operati fil-viċinanza tal-kosta u esklussivament għall-bastimenti;

għandha tapplika bil-miktub lir-Regolatur għas-Servizzi tal-Enerġija u l-Ilma u għandu jkollha fil-pussess tagħha awtorizzazzjoni maħruġa mir-Regolatur taħt dawn ir-regolamenti qabel ma tipprovdi u toffri dak is-servizz, u topera dik is-sistema, u twettaq u teżerċita dik l-attività ta’ servizz.

Applikanti prospettivi mistiedna jirreferu għall-Mudell ta’ Awtorizzazzjoni għal Pompa li Tbigħ il-Karburanti Marittimi bl-Imnut sabiex jiksbu idea ċara tal-awtorizzazzjonijiet ta’ dan it-tip li jinħarġu mir-REWS.

Applikazzjoni għal awtorizzazzjoni għall-operazzjoni ta’ pompa li tbigħ il-karburanti marittimi bl-imnut permezz ta’ dispensers operati fil-viċinanza tal-kosta u esklussivament għall-bastimenti:

Formola ta’ Applikazzjoni Elettronika Pompa li Tbigħ il-Karburanti Marittimi bl-Imnut (Verżjoni bl-Ingliż)

Formola ta’ Applikazzjoni Pompa li Tbigħ il-Karburanti Marittimi bl-Imnut (Verżjoni bl-Ingliż) REWS/107/v7-03-12/23

Nota: Importanti li wieħed jinnota li, bħala punt uniku ta’ servizz, ir-Regolatur jirċievi wkoll l-applikazzjoni relatata li trid tiġi sottomessa lill-Awtorità tat-Trasport f’Malta (TM). Meta jkun qed japplika għal awtorizzazzjoni mir-REWS, l-applikant irid jissottometti ż-żewġ formoli mimlijin kif mitlub. Ir-Regolatur ma jistax joħroġ awtorizzazzjoni qabel ma t-TM tkun ħarġet Permess ta’ Operatur tal-Bunkering f’isem l-applikant.

Regolamenti dwar l-Awtorizzazzjoni ta’ Bunkering – L.S. 545.25

1. Dettalji/numru tal-karta tal-identità jew tal-passaport tal-applikant;
2. F’każ ta’ entità legali, dettalji/numru(i) tal-karta(i) tal-identità jew passaport(i) tar-rappreżentant(i) legali;
3. Firma tal-applikant bl-idejn jew f’każ ta’ entità legali, il-firma(firem) tar-rappreżentant(i) legali tal-entità.

Barra minn hekk, f’każ ta’ applikazzjonijiet għat-trasferiment ta’ Awtorizzazzjoni, id-dettalji hawn fuq imsemmija għandhom jiġu sottomessi wkoll fir-rigward tal-provditur awtorizzat kurrenti.

F’każ ta’ applikazzjoni għall-ħruġ, tiġdid jew trasferiment ta’ awtorizzazzjoni:

1. Kopja tal-karta tal-identità jew tal-passaport tal-applikant;
2. F’każ ta’ entità legali, kopji tal-karta(i) tal-identità jew tal-passaport(i) tar-rappreżentant(i) legali;
3. Ċertifikat riċenti (<3 xhur) tal-kondotta tal-applikant, maħruġ mill-Pulizija. F’każ ta’ kumpanija/Organizzazzjoni Legali, jintalbu ċ-ċertifikati tal-kondotta maħruġa mill-Pulizija fir-rigward tad-Diretturi u r-Rappreżentanti Legali kollha.

Fl-istadju tad-disinn ta’ pompa proposta li tbigħ il-karburanti marittimi bl-imnut, trid tiġi sottomessa wkoll din id-dokumentazzjoni:

1. Żewġ (2) kopji ta’ proposta teknika kkompilata mill-Persuna Kompetenti li tindika d-dettalji tad-disinn propost għall-pompa li tbigħ il-karburanti marittimi bl-imnut (MFRS), li għandhom jinkludu dokument tekniku ta’ sostenn, ir-rapport li jiddiskrivi l-MFRS proposta u l-operazzjonijiet assoċjati tagħha, pjanta tas-sit fi skala 1:2500 u disinji f’daqs minimu A3.

Wara li jkun inħareġ permess preliminari mir-Regolatur, u malli titlesta l-pompa l-ġdida li tbigħ il-karburanti marittimi bl-imnut, trid tiġi sottomessa wkoll din id-dokumentazzjoni:

• Ċertifikat ta’ konformità maħruġ mill-Awtorità tal-Ippjanar fir-rigward tal-pompa li tbigħ il-karburanti marittimi bl-imnut;
• Kopja tal-Permess Ambjentali / Permess dwar il-Prevenzjoni u l-Kontroll Integrat tat-Tniġġis (IPPC) maħruġ mill-Awtorità għall-Ambjent u r-Riżorsi fir-rigward tal-installazzjoni;
• Il-permess ta’ operatur tal-bunkering maħruġ minn Transport Malta;
• Permess ta’ encroachment maħruġ mid-Diviżjoni tal-Proprjetà tal-Gvern peress li l-linja tal-kosta hi meqjusa bħala proprjetà pubblika;
• Rapport tal-Kummissjonar maħruġ minn Persuna Kompetenti fir-rigward tal-pompa li tbigħ il-karburanti marittimi bl-imnut;
• Kopja tal-iskeda tal-assigurazzjoni u d-dettalji tal-polza tal-assigurazzjoni rispettiva, li tindika l-livell ta’ kopertura għar-responsabbiltà lejn terzi persuni fil-konfront ta’ ħsara fuq il-persuna u ħsara lill-proprjetà kkawżati mill-ħżin tal-karburanti u l-operazzjonijiet assoċjati tal- pompa li tbigħ il-karburanti marittimi bl-imnut.

F’każ ta’ trasferiment ta’ pompa eżistenti u operattiva, li tbigħ il-karburanti marittimi bl-imnut, trid tiġi sottomessa din id-dokumentazzjoni:

• Rapport tal-Awditjar dwar Spezzjoni tal-pompa li tbigħ il-karburanti marittimi bl-imnut, regolarment ikkompilat minn Persuna Kompetenti;
• Kopja tal-iskeda tal-assigurazzjoni u d-dettalji tal-polza tal-assigurazzjoni rispettiva tal-pompa eżistenti;
• Kwalunkwe dokumentazzjoni oħra meħtieġa mir-Regolatur jew mill-kundizzjonijiet tal-awtorizzazzjoni.

It-tariffi applikabbli huma kif ġej:

• Tariffa annwali tal-awtorizzazzjoni ta’ €500 (ħames mitt ewro) u €50 (ħamsin ewro) għal kull żennuna u ħlas ta’ 0.20 ewro għal kull tunnellata ta’ karburant rilaxxat għall-finijiet ta’ bunkering marittimu.
• Tariffa tal-applikazzjoni, mhix rifondibbli, ta’ €500 (ħames mitt ewro);

Ir-regolament 24 tar-Regolamenti dwar l-Awtorizzazzjoni ta’ Bunkering jistabbilixxi li jekk persuna twettaq xi reat kontra dawn ir-regolamenti, meta tinstab ħatja tista’ teħel multa ta’ mhux aktar minn disgħa u sittin elf ewro (€69,000), jew ta’ elf u tliet mitt ewro (€1,300) għal kull jum li fih jibqa’ għaddej ir-reat.

Barra minn hekk, l-Att dwar ir-Regolatur għas-Servizzi tal-Enerġija u l-Ilma jipprovdi li:

1. kwalunkwe persuna li twettaq tali attività mingħajr liċenzja jew taġixxi bi ksur ta’ xi kundizzjoni tal-liċenzja tkun ħatja ta’ reat u teħel, meta tinstab ħatja, multa ta’ mhux iżjed minn mija u ħmistax-il elf ewro (€115,000) jew priġunerija għal żmien ta’ mhux iżjed minn sentejn, jew tali multa u priġunerija flimkien.
2. ir-Regolatur jista’ jimponi penali amministrattiva fuq kwalunkwe persuna li tikser xi dispożizzjoni tal-Att jew tar-regolamenti magħmulin taħtu jew ta’ kwalunkwe liġi oħra li r-Regolatur għandu jedd jinforza, jew li tonqos milli tikkonforma ruħha ma’ xi direttiva jew deċiżjoni mogħtija mir-Regolatur, jew li tonqos milli tosserva kwalunkwe kundizzjoni ta’ xi awtorizzazzjoni mogħtija taħt l-Att. Din il-multa amministrattiva m’għandhiex teċċedi:
   • mitt elf ewro (€100,000) għal kull kontravenzjoni u, jew sitt mitt ewro (€600) għal kull jum ta’ nuqqas ta’ konformità, mid-data tad-deċiżjoni mogħtija mir-Regolatur; u, jew
   • f’każ ta’ intrapriża (inkluż intrapriża integrata vertikalment) jew korp ġuridiku, sa 10% tad-dħul totali kkonċernat fis-sena finanzjarja preċedenti. Madankollu, f’każ ta’ intrapriża, inkluż intrapriża integrata vertikalment jew korp ġuridiku, tista’ fi kwalunkwe każ tiġi imposta multa sa 10% tad-dħul annwali kkonċernat fis-sena finanzjarja preċedenti, liema ammont jeċċedi mitt elf ewro (€100,000).

Ir-Regolatur għandu jikkomunika mal-applikant bil-miktub fi żmien raġonevoli, li m’għandux ikun ta’ aktar minn xahrejn mid-data meta tasal għandu applikazzjoni valida, kwalunkwe deċiżjoni meħuda li tikkonċerna applikazzjoni għal awtorizzazzjoni jew applikazzjoni għat-tiġdid ta’ awtorizzazzjoni jew kwalunkwe raġuni valida li timpedixxi r-Regolatur milli jieħu tali deċiżjoni.

Awtorizzazzjoni li tiskadi tista’ tiġi mġedda, u applikazzjoni għat-tiġdid ta’ awtorizzazzjoni għandha tiġi sottomessa bil-miktub lir-Regolatur, bil-mod kif ir-Regolatur jista’ jitlob, tliet xhur qabel id-data li fiha tkun se tiskadi l-awtorizzazzjoni.

Ir- Regolamenti dwar l-Awtorizzazzjoni ta’ Bunkering jistabbilixxu wkoll li, f’każ li r-Regolatur jonqos milli jinforma lill-applikant dwar kwalunkwe deċiżjoni meħuda li tikkonċerna aċċess għal xi attività ta’ servizz jew l-eżerċizzju tagħha, inkluż ir-rifjut jew l-irtirar ta’ xi awtorizzazzjoni, dan bl-ebda mod m’għandu jfisser li r-Regolatur ikun approva dik l-awtorizzazzjoni b’mod taċitu u li l-applikant ikun awtomatikament ġie mogħti aċċess biex iwettaq jew jeżerċita xi attività ta’ servizz.

Kull deċiżjoni li tittieħed mir-Regolatur, inkluż ċaħda ta’ applikazzjoni jew irtirar ta’ awtorizzazzjoni, tista’ tkun soġġetta għal appell quddiem it-Tribunal ta’ Reviżjoni Amministrattiva mwaqqaf bl-artikolu 5 tal-Att Dwar l-Amministrazzjoni tal-Ġustizzja u d-dispożizzjonijiet tal-artikolu 13 tar-Regolamenti dwar l-Awtorizzazzjoni ta’ Bunkering – L.S. 545.25.

Tista’ tissottometti l-formola tal-applikazzjoni flimkien mad-dokumentazzjoni kollha relatata u l-pagamenti relevanti msemmija fil-formola tal-applikazzjoni, bil-posta jew inkella bl-idejn indirizzata lil:

Ir-Regolatur għas-Servizzi tal-Enerġija u l-Ilma,
Zentrum Business Centre, Livell 1
Triq l-Imdina
Ħal Qormi QRM 9010
Malta