Applikazzjoni biex Issir Electrician Awtorizzat

Awtorizzazzjoni A għat-Twettiq ta’ Installazzjoni, Alterazzjoni, Estensjoni u Ċertifikazzjoni ta’ Installazzjonijiet Elettriċi Single-Phase

Awtorizzazzjoni B għat-Twettiq ta’ Installazzjoni, Alterazzjoni, Estensjoni u Ċertifikazzjoni ta’ Installazzjonijiet Elettriċi Single-Phase u Installazzjonijiet Elettriċi Three-Phase b’Kapaċità Nominali sa 300 Amp kull Fażi

Ir-Regolatur għas-Servizzi tal-Enerġija u l-Ilma joħroġ Awtorizzazzjonijiet A u Awtorizzazzjonijiet B lil persuni kompetenti taħt ir-Regolamenti dwar l-Installazzjonijiet Elettriċi (L.S. 545.24).

Kwalunkwe persuna li tixtieq li tinħarġilha Awtorizzazzjoni A jew Awtorizzazzjoni B għandha tapplika bil-miktub lir-REWS permezz tal-formoli apposta hawn taħt.

Applikanti prospettivi jridu jagħmlu eżami għall-awtorizzazzjoni applikabbli (A jew B) li jiġi organizzat għal dan l-għan mid-Dipartiment tal-Eżamijiet, u jgħaddu mill-eżami relevanti. Aktar dettalji jistgħu jinkisbu minn https://exams.gov.mt/articles/Boards/Local_Licences_Examinations.aspx.

Applikanti prospettivi li ma jagħmlux l-eżami mtella’ mid-Dipartiment tal-Eżamijiet f’Malta, iżda li għandhom kwalifika akkademika alternattiva, għandhom jissottomettu, flimkien mal-applikazzjoni tagħhom:

1. kopji oriġinali ta’ dawn iċ-ċertifikati u
2. ċertifikat, mill-Kummissjoni Nazzjonali għall-Edukazzjoni Avvanzata u Ogħla ta’ Malta – NCFHE (http://www.ncfhe.gov.mt/), li jevalwa l-kwalifiki akkademiċi relevanti ppreżentati mill-applikant u jipprovdi l-livell MQF ekwivalenti.

Sillabu tal-Awtorizzazzjoni A u applikabbli għall-eżamijiet organizzati mid-Dipartiment tal-Eżamijiet wara 1 ta’ Jannar 2023 – Sillabu

Sillabu tal-Awtorizzazzjoni B u applikabbli għall-eżamijiet organizzati mid-Dipartiment tal-Eżamijiet wara 1 ta’ Jannar 2023 – Sillabu

Applikanti jintalbu jattendu u jgħaddu b’suċċess minn intervista li ssir mir-Regolatur għas-Servizzi tal-Enerġija u l-Ilma bħala mezz ta’ assessjar tal-kompetenza qabel ma tinħareġ l-Awtorizzazzjoni relevanti. L-applikanti għandhom ikunu kapaċi li jikkomunikaw bil-Malti u/jew bl-Ingliż.

Aktar dettalji jistgħu jinkisbu mid-dokument:  Rekwiżiti għall-Electricians.

Formoli tal-Applikazzjonijiet għal Awtorizzazzjoni A jew Awtorizzazzjoni B:

Formoli tal-Applikazzjonijiet għal Awtorizzazzjoni A jew Awtorizzazzjoni B e-Form

Regolamenti dwar l-Installazzjonijiet Elettriċi (L.S. 545.24)

• Dettalji/numru tal-karta tal-identità jew tal-passaport.
• Firma bl-idejn fuq il-formola tal-applikazzjoni.

1. Kopja tal-karta tal-identità jew tal-passaport tal-applikant.
2. F’każ ta’ applikazzjoni għal Awtorizzazzjoni A, l-applikant għandu jipprovdi evidenza dokumentata ta’ esperjenza ta’ xogħol ta’ mill-inqas tnax-il xahar fuq installazzjonijiet elettriċi single-phase li jkun sar taħt is-superviżjoni ta’ detentur ta’ Awtorizzazzjoni B jew inġinier elettriku bil-warrant. Din l-evidenza trid tiġi ċċertifikata mis-superviżur.
3. F’każ ta’ applikazzjoni għal Awtorizzazzjoni B, l-applikant għandu jipprovdi evidenza dokumentata ta’ esperjenza ta’ xogħol ta’ mill-inqas erbgħa u għoxrin (24) xahar fuq installazzjonijiet elettriċi three-phase li jkun sar taħt is-superviżjoni ta’ detentur ta’ Awtorizzazzjoni B jew inġinier elettriku bil-warrant. Din l-evidenza trid tiġi ċċertifikata mis-superviżur.

Għall-applikanti kollha:

1. L-applikant irid jissottometti dikjarazzjoni maħruġa minn tabib, kif speċifikat fil-formola tal-applikazzjoni, li tiċċertifika li l-applikant mhux affetwat minn kundizzjoni ta’ daltoniżmu (ma jagħrafx il-kuluri) li tista’ tikkawża insuffiċjenza fil-vista u tirriżulta f’eżekuzzjoni perikoluża u żbaljata tax-xogħol ta’ installazzjoni ta’ sistemi ta’ wajers elettriċi.
2. L-applikant irid jippreżenta ċertifikat tal-kondotta li jkun inħareġ mill-Pulizija mhux aktar minn 3 xhur qabel id-data tal-applikazzjoni.

Kwalifiki:

1. Kopja tal-ittra maħruġa mid-Dipartiment tal-Eżamijiet li tindika li l-applikant wettaq b’suċċess l-eżami ta’ Wireman; jew
2. F’każ ta’ inġinier elettriku bil-warrant li qed japplika għal awtorizzazzjoni, kopja tal-warrant. Jekk l-inġinier bil-warrant ma jkunx fil-lista ta’ inġiniera bil-warrant fl-aħħar avviż fil-Gazzetta tal-Gvern, trid tiġi sottomessa wkoll it-traskrizzjoni tal-kors tal-lawrja fl-inġinerija maħruġa mill-Università.
3. F’każ ta’ kwalifika(i) alternattiva(i), iridu jiġu sottomessi dawn id-dokumenti addizzjonali:
   1. kopja awtentikata taċ-ċertifikati fir-rigward tal-kwalifiki alternattivi;
   2. kopja taċ-ċertifikazzjoni maħruġa mill-Kummissjoni Nazzjonali għall-Edukazzjoni Avvanzata u Ogħla (NCFHE) li tikkonferma li l-kwalifiki alternattivi li qed jiġu ppreżentati huma rikonoxxuti bħala ekwivalenti għal-livell ta’ kwalifiki meħtieġa għall-applikazzjoni;
   3. il-kontenut tal-korsijiet u s-sillabi tal-kwalifiki alternattivi li qed jiġu ppreżentati, sabiex ikun jista’ jsir assessjar mir-Regolatur.

1. It-tariffa tal-applikazzjoni għal Awtorizzazzjoni A jew B hija ta’ €12 (tnax-il ewro).
2. It-tariffi tal-Awtorizzazzjoni huma:
   1. €35 (ħamsa u tletin ewro) kull tliet snin f’każ ta’ detentur ta’ Awtorizzazzjoni A.
   2. €70 (sebgħin ewro) kull tliet snin f’każ ta’ detentur ta’ Awtorizzazzjoni B.

Ir-Regolamenti dwar l-Installazzjonijiet Elettriċi (L.S. 545.24) jistabbilixxu dawn il-penali li ġejjin:

1. Tariffa għal ħlas tard, ta’ €12 (tnax-il ewro) jekk l-awtorizzazzjoni ma tiġix imġedda fi żmien 30 jum (f’Jannar) kif stipulat mir-regolamenti – (Regolament 8(3));
2. Sospensjoni ta’ Awtorizzazzjoni li tibqa’ ma tiġġeddidx wara l-avviż finali mir-Regolatur – (Regolament 8(5));
3. Sospensjoni tal-Awtorizzazzjoni għal perjodu ta’ żmien definit f’każ ta’ kwalunkwe ksur elenkat f’Regolament 11. Il-lista ta’ każijiet ta’ ksur tinkludi:
   1. ksur ta’ dawn ir-regolamenti;
   2. nuqqas ta’ konformità mal-kundizzjonijiet ta’ dawn ir-regolamenti;
   3. nuqqas ta’ konformità mal-kundizzjonijiet ta’ awtorizzazzjoni maħruġa minn xi awtorità li jkollha ġurisdizzjoni fuq xogħlijiet ta’ installazzjoni elettrika;
   4. nuqqas ta’ tiswija ta’ installazzjonijiet jew tagħmir elettriku difettużi wara twissija bil-miktub maħruġa minn kwalunkwe awtorità oħra jew minn operatur tas-sistema ta’ distribuzzjoni;
   5. nuqqas ta’ ħlas ta’ kwalunkwe tariffa regolarment dovuta taħt dawn ir-regolamenti.
4. Multa ta’ €200 (mitejn ewro) tista’ tiġi imposta mir-Regolatur għal kull jum ta’ non-konformità f’każ li l-provditur awtorizzat jonqos milli josserva d-direzzjoni maħruġa mir-Regolatur sabiex jirranġa prattiċi ħażina jew difetti li jkunu ġew konfermati – (Regolament 24);
5. Tariffa ta’ €30 (tletin ewro) hi applikabbli għas-sostituzzjoni tad-dokument ta’ identifikazzjoni ta’ Awtorizzazzjoni, f’każ li dan jintilef jew jinqered – (Regolament 25);
6. Penali bejn €1,000 (elf ewro) u €100,000 (mitt elf ewro) f’każ li persuna mhix awtorizzata tinstab ħatja li użat dokument ta’ identifikazzjoni ta’ Awtorizzazzjoni biex tagħti x’tifhem li hi d-detentur ta’ awtorizzazzjoni valida – (Regolament 25).

Barra minn hekk, l-Att dwar ir-Regolatur għas-Servizzi tal-Enerġija u l-Ilma jipprovdi li:

1. kwalunkwe persuna li twettaq tali attività mingħajr liċenzja jew taġixxi bi ksur ta’ xi kundizzjoni tal-liċenzja tkun ħatja ta’ reat u teħel, meta tinstab ħatja, multa ta’ mhux iżjed minn mija u ħmistax-il elf ewro (€115,000) jew priġunerija għal żmien ta’ mhux iżjed minn sentejn, jew tali multa u priġunerija flimkien.
2. ir-Regolatur jista’ jimponi penali amministrattiva fuq kwalunkwe persuna li tikser xi dispożizzjoni tal-Att jew tar-regolamenti magħmulin taħtu jew ta’ kwalunkwe liġi oħra li r-Regolatur għandu jedd jinforza, jew li tonqos milli tikkonforma ruħha ma’ xi direttiva jew deċiżjoni mogħtija mir-Regolatur, jew li tonqos milli tosserva kwalunkwe kundizzjoni ta’ xi awtorizzazzjoni mogħtija taħt l-Att. Din il-multa amministrattiva m’għandhiex teċċedi:
   1. mitt elf ewro (€100,000) għal kull kontravenzjoni u, jew sitt mitt ewro (€600) għal kull jum ta’ nuqqas ta’ konformità, mid-data tad-deċiżjoni mogħtija mir-Regolatur; u, jew
   2. f’każ ta’ intrapriża (inkluż intrapriża integrata vertikalment) jew korp ġuridiku, sa 10% tad-dħul totali kkonċernat fis-sena finanzjarja preċedenti. Madankollu, f’każ ta’ intrapriża, inkluż intrapriża integrata vertikalment jew korp ġuridiku, tista’ fi kwalunkwe każ tiġi imposta multa sa 10% tad-dħul annwali kkonċernat fis-sena finanzjarja preċedenti, liema ammont jeċċedi mitt elf ewro (€100,000).

Deċiżjoni dwar applikazzjoni kompluta u valida tingħata bil-miktub mir-Regolatur għas-Servizzi tal-Enerġija u l-Ilma fi żmien tliet (3) xhur mid-data tal-applikazzjoni. (Regolament 7(3)).

Ġeneralment, il-Liġi Amministrattiva ta’ Malta tistabbilixxi li n-nuqqas ta’ tweġiba titqies bħala ekwivalenti għal ċaħda u l-applikant għandu d-dritt ta’ appell.

Kull deċiżjoni li tittieħed mir-Regolatur, inkluż ċaħda ta’ applikazzjoni jew irtirar ta’ awtorizzazzjoni jew liċenzja, tista’ tkun soġġetta għal appell quddiem it-Tribunal ta’ Reviżjoni Amministrattiva mwaqqaf bl-Artikolu 5 tal-Att Dwar l-Amministrazzjoni tal-Ġustizzja.

Dettalji għall-kuntatt:

Ir-Regolatur għas-Servizzi tal-Enerġija u l-Ilma,
Zentrum Business Centre, Livell 1
Triq l-Imdina
Ħal Qormi QRM 9010
Malta