Artiklu 5 tal-Att dwar ir-Regolatur għas-Servizzi tal-Enerġija u l-Ilma jistabbilixxi l-funzjonijiet tar-Regolatur għas-Servizzi tal-Enerġija u l-Ilma. Dan l-Artiklu jagħti responsabbiltajiet wiesgħa lir-Regolatur fil-qasam tar-regolamentazzjoni ta’ prattiċi, operat u attivitajiet fis-setturi tal-enerġija u l-ilma. Dan jinkludi r-regolamentazzjoni ta’:
- l-utilitajiet nazzjonali u l-provdituri tas-servizzi tal-enerġija u l-ilma, jiġifieri l-Enemalta plc, il-Korporazzjoni għas-Servizzi tal-Ilma u l-kumpaniji sussidjarji tagħhom;
- il-bejjiegħa u l-operaturi fis-setturi regolati fosthom: l-operaturi tal-pompi tal-petrol, il-provdituri u d-distibuturi tal-gass u tal-pitrolju, il-kumpaniji tal-offshore bunkering, l-operaturi privati tal-impjanti tad-desalinazzjoni u l-operaturi tal-bawżers;
- il-ħaddiema tas-sengħa u l-provdituri tas-servizzi fosthom l-electricians, l-installaturi tas-sistemi tal-enerġija rinnovabbli u l-persuni kompetenti fis-setturi regolati.
Ir-Regolatur huwa wkoll deżinjat bħala l-entità ċentrali ta’ ħżin għas-sigurtà tal-ħażna skont id-Direttiva 2009/119/KE tal-Kunsill tal-14 ta’ Settembru 2009, liema direttiva timponi obbligi fuq l-Istati Membri sabiex iżommu ħażniet minimi taż-żejt mhux maħdum u/jew ta’ prodotti petroliferi.
