Libertà tal-Informazzjoni
L-Att dwar il-Libertà tal-Informazzjoni
Persuni eliġibbli jistgħu jissottomettu talbiet lil Awtoritàjiet pubbliċi stabbiliti biex jagħtuhom informazzjoni skont l-Att dwar il-Libertà tal-Informazzjoni. Dan jinkiudi wkoll ir-Regolatur għas-Servizzi tal-Enerġija u l-Ilma. Talbiet għal din l-informazzjoni għandhom ikunu bil-miktub fuq formoli stabbiliti u għandhom jintbagħtu fl-uffiċini tar-Regolatur għas-Servizzi tal-Enerġija u l-Ilma, jew bil-posta elettronika jew fuq is-sit web www.foi.gov.mt jew bl’użu tal-e-ID.
Att dwar il-Libertà tal-Informazzjoni (Verżjoni bil-Malti)
Sottomissjonijiet ta’ Talbiet / Ilmenti
Persuni Eliġibbli:
Sabiex persuna tkun eliġibbli li tissottometti talba għal informazzjoni skont l-Att dwar il-Libertà tal-Informazzjoni, il-persuna trid tkun residenti ta’ Malta għal perjodu ta mhux inqas minn ħames snin. Din il-persuna trid tkun ukoll: cittadina ta’ Malta, jew ċittadina ta’ Membru Stat ieħor tal-Unjoni Ewropea, jew ċittadina ta’ stat ieħor fejn iċ-ċittadini għandhom id-dritt li jiġu meqjusa bl-istess mod ta’ ċittadini tal-Membri Stati tal-Unjoni Ewropea skont it-trattat bejn dak l-istat u l-Unjoni Ewropea.
Talbiet jew formoli tal-ilmenti għandhom ikunu bil-miktub, u jistgħu jintbagħtu bil-posta elettronika lil foi.rews@rews.org.mt jew fuq is-sit web www.foi.gov.mt jew bl-użu tal-e-ID, jew permezz tal-formola online (mingħajr il-ħtiega li l-applkant ikun irreġistrat bl-e-ID).
Informazzjoni li għandha tingħata
Meta applikant jimla l-formola tal-applikazzjoni barra mid-dettalji ta’ kuntatt taiegħu, huwa għandu jagħti indikazzjoni ta’ liema dokument/ informazzjoni huwa jixtieq li jikseb. Huwa wkoll għandu jindika f’liema format jixtieq li jirċievi d-dokument / l-informazzjoni, jiġifieri jew hux bħala kopja stampata, kopja elettronika, forma ta’ sommarju / silta tal-kontenut jew billi ssir spezzjoni fuq il-post tad-dokument / informazzjoni inkwstjoni. F’każijiet ta’ talbiet li jirrigwardaw speċifikament: individwu, assi jew interessi ta’ individwu, jew id-drittijiet ta’ aċċess ta’ individwu, l-Awtorità Pubblika tista’, skont il-ħtieġa, titlob kopji tal-karta tal-identità jew passport u/jew dokumenti oħra.
Tipi ta’ Talbiet
B’mod ġenerali persuna tista’ titlob għal kwalunkwe artiklu miżmum minn awtorità pubblika u fuq xiex informazzjoni ġiet reġistrata fi kwalunkwe mod. Dan jinkludi; data elettronika, stampi, mudelli ta’ skala u rappreżentazzjonijiet viżwali oħra, u reġistrazzjonijiet bl-awdjo u b’vidjo, irrispettivament jekk persuna tkunx tista’ taqra, tara, tisma’ l-informazzjoni jew jekk l-informazzjoni tistax tinġabar kemm bl-użu kif ukoll mingħajr l-użu ta’ xi ħaġa oħra jew xi apparat ieħor. Persuna tista’ titlob għal dokumentazzjoni li tinkludi fiha politika, prinċipji, regoli jew linji gwida skont deċiżjonijiet jew rakkomandazzjonijiet magħmula għar-rigward ta’ membri tal-pubbliku (inkluż għar-rigward ta’ persuna ġuridika, u ta’ impjegati ta’ awtorità pubblika fil-kapaċità personali tagħhom). Barra minn dan, persuni eliġibbli għandhom id-dritt li jitolbu informazzjoni (fil-forma ta’ stqarrija bil-miktub) fuq deċiżjoni jew rakkomandazzjoni magħmula fir-rigward tagħhom jew fir-rigward ta’ persuna ġuridika li huma jirrappreżentaw.
Dikjarazzjoni ta’ Rċevuta
Talbiet għal informazzjoni skont l-Att dwar il-Libertà tal-Informazzjoni jingħataw dikjarazzjonijiet ta’ rċevuta mill-Awtoritàjiet Pubbliċi. Il-formoli tad-dikjarazzjonijiet ta’ rċevuta jkollhom numru uniku ta’ reġistrazzjoni u indikazzjoni tad-data ta’ skadenza meta tweġiba għandha tingħata. Il-formoli għandhom jinkludu informazzjoni speċifika dwar l-Awtorità Pubblika bħal l-indirizz, in-numri tal-telefown, l-indirizzi tal-posta elettronika, il-ħinijiet ta’ ftuħ, kif ukoll dettalji dwar il-proċeduri interni dwar ilmenti.
Verifiki magħmula minn Awtorità Pubblika
Wara li Awtorità Pubblika tkun irċeviet applikazzjoni, hija tivverifika jekk it-talba tikwalifikax bħala talba għal Informazzjoni skont l-Att dwar il-Libertà tal-Informazzjoni u tinforma l-applikant jekk dan ma jkunx il-każ. Jekk jirriżulta li hemm il-ħtieġa ta’ informazzjoni/dokumenti addizjonali, l-Awtorità Pubblika li tkun laqgħet it-talba tista’ tikkuntatja l-applikant u dan jingħata l-għajnuna possibli sabiex it-talba tikkonforma mad-dispożizzjonijiet tal-Att. Madankollu, meta applikant jitlob għal informazzjoni skont l-Att dwar il-Libertà tal-Informazzjoni, huwa m’għandux għalfejn jagħti raġunijiet għat-talba tiegħu.
L-Awtorità Pubblika tagħmel ukoll il-verifiki tagħha dwar jekk għandiex id-dokumenti/ l-informazzjoni mitluba. Jekk dan ma jkunx il-każ, l-Awtorità Pubblika tfittex li tidentifika l-entità proprja li għandha tilqa’ t-talba magħmula u titrasferixxi l-applikazzjoni skont il-każ (u fil-proċess tinforma wkoll lill-applikant). L-applikant jkun wkoll infurmat skont il-każ jekk ma tinstab l-ebda entità (jiġifieri d-dokumenti /l-informazzjoni mitluba ma jistawx jiġu marbuta ma’ ebda Awtorità Pubblika).
Proċessar tal-Talbiet
Ladarba talba għal informazzjoni tkun stabbilita li hija skont l-Att dwar il-Libertà tal-Informazzjoni, l-Awtorità Pubblika tiddetermina jekk tkunx tista’ tipprovdi d-dokumenti/l-informazzjoni mitluba, (kompletament jew parzjalment), lill-applikant jew jekk għandiex tiċħad din it-talba. L-Awtorità Pubblika għandha, qabel ma tieħu deċiżjoni f’dan ir-rigward, twieżen jekk id-dispożizzjonijiet dwar l-eżenzjonijiet tal- Att dwar il-Libertà tal-Informazzjoni japplikawx. L-Awtorità Pubblika tavża permezz ta’ notifika maħruġa fi żmien għoxrin ġurnata ta’ xogħol minn meta tirċievi it-talba, jekk din it-talba se tiġix aċċettata jew le. L-Awtorità Pubblika tista’ tapplika għal estensjoni ta’ għoxrin ġurnata sa massimu ta’ erbgħin ġurnata xogħol mid-data li tirċievi t-talba oriġinali.
Ħlas ta’ Tariffa
L-Awtorità Pubblika għandha, meta tinforma l-applikant bir-risposta, tindika wkoll jekk hija tapplika xi tariffa. Jekk dan ikun applikabbli, it-tariffi għandhom ikopru l-ispejjez relatati mad-disponnibiltà tad-dokument lill-applikant, jiġifieri is-sigħat ta’ xogħol tal-ipproċessar, l-ispiża ta’ kopji stampati / kopji bil-faks u media diġitali u spejjeż relatati ma’ spezzjonijiet. Minkejja dan, it-tariffa totali applikabbli ma għandiex teċedi €40. Ma jistgħux jiġu applikati spejjeż oħra sabiex jintlaqgħu applikazzjonijiet jew ilmenti.
It-tariffi għal applikazzjonijiet huma regolati b’ A.L. 158 tal-2010
Azzjoni Korretiva
Jekk applikant ma jkunx sodisfatt bit-tweġiba mogħtija lilu minn Awtorità Pubblika fir-rigward tat-talba tiegħu, huwa jista’ jissottometti lment għand l-istess Awtorità Pubblika. Jekk, wara dan huwa jibqa’ ma jkunx sodisfatt bit-tweġiba li jkun irċieva, huwa jista’ jissottometti appell mal-Kummissarju għall-Informazzjoni u l-Protezzjoni tad-Data (KIPD). Jekk l-applikant jibqa’ ma jkunx sodisfatt bl-eżitu tal-appell, huwa jista’ jappella għand it-Tribunal tal-Appelli dwar l-Informazzjoni u l-Protezzjoni tad-Data, u wara għand il-Qorti tal-Appell. Ilmenti jistgħu jiġu sottomessi għal dawn ir-raġunijiet:
- Jekk it-talba ma tkunx meqjusa li hija talba għal informazzjoni skont l-Att dwar il-Libertà tal-Informazzjoni;
- L-Awtorità Pubblika tkun applikat iż-żmien ta’ estensjoni ta’ għoxrin ġurnata sabiex tavża dwar l-aċċess għal applikazzjoni għal dokumenti/ informazzjoni mitluba;
- L-Awtorità Pubblika tkun imponiet tariffa li hija meqjusa eċċessiva;
- Dokument ma jkunx provdut fil-format mitlub;
- It-talba għal informazzjoni tkun ġiet miċħuda.
Persuna tista’ tissottometti lment jekk Awtorità Pubblika ma tosservax l-għoxrin ġurnata ta’ skadenza (jew l-iskadenza indikata fl-avviż ta’ estensjoni, jekk din id-data tkun tapplika) biex tagħti tweġiba. Il-formoli tal-applikazzjoni jistgħu jitniżżlu direttament mis-sit web tal-FOI www.foi.gov.mt jew jintużaw il-formoli online ta’ lment hawn taħt indikati:
https://secure2.gov.mt/foi/online-form
https://secure2.gov.mt/foi/complaint-online-form
Aċċettazzjoni ta’ Dokumenti / Informazzjoni
Kull meta Awtorità Pubblika tikkomunika deċiżjoni lil applikant li l-aċċess għal dokument/informazzjoni ser tingħata, l-applikant għandu jiġi wkoll mistieden li jħallas it-tariffa kif applikabbli. Fi żmien ta’ għaxart ijiem mill-ħlas, l-Awtorità Pubblika għandha tipprovdi d-dokument/l-informazzjoni fl-istess format mitlub mill-applikant jew, jekk dan ma jkunx possibbli, b’format ieħor meqjus xieraq mill-Awtorità Pubblika. L-applikanti li jissottomettu talbiet permezz tas-sit web tal-FOI (www.foi.gov.mt) jistgħu jingħataw l-faċilità li jniżżlu d-dokument /l-informazzjoni direttament minn dan is-sit.
Jekk l-ebda tariffa ma tkun dovuta, id-dokumenti/ l-informazzjoni mitluba għandhom jiġu provduti fi żmien għaxart ijiem mid-data tan-notifika. It-talba tkun meqjusa rtirata mill-applikant jekk il-ħlas ma jsirx fi żmien għoxrin ġurnata minn notifikazzjoni.
Informazzjoni disponibbli skont Artiklu 17 tal-Att dwar il-Libertà tal-Informazzjoni tista’ tiġi aċċessata mil-links hawn taħt jew billi tikkuntatja lil:
L-Uffiċjal għal Libertà tal-Informazzjoni
Regulatur għas-Servizzi tal-Enerġija u l-Ilma
Zentrum Business Centre, Livell 1
Triq l-Imdina
Ħal Qormi QRM9010
Malta
Posta Elettronika: foi.rews@rews.org.mt
Dokumenti
Dikjarzzjonijet ta’ Deċiżjonijiet
Artiklu 17 tal-Att dwar il-Libertà tal-Informazzjoni (Tabella)
